யாழ்ப்பாண மாநகர சபையின் மேயர் பதவி ததேகூ இல் இருந்து பறிபோனதற்குக் காரணம் என்ன?! TNA கனடா கிளையின் கருத்து!

யாழ்ப்பாண மாநகர சபையின் மேயர் பதவி ததேகூ இல் இருந்து பறிபோனதற்குக் காரணம் கட்சித் தலைமை பெரும்பான்மை இருக்கிறதோ இல்லையோ ஆனோல்ட் அவர்களை வேட்பாளராக நிறுத்தியதுதான் காரணம். எதிர்க்கட்சிகள் ஆனோல்ட் தவிர வேறு யாரையாவது ததேகூ நிறுத்தியிருந்தால் அவர் போட்டியின்றி வென்றிருப்பார். எதிர்க்கட்சிகள் ஆனோல்ட் தவிர வேறொருவருக்கு மேயராகத் தெரிவு செய்வதற்கு பகிரங்கமாக ஆதரவு தெரிவித்திருந்தனர். உறுப்பினர் சிறிலை ஓரங்கட்டுவதில் தலைமை முனைப்பாக இருந்திருக்கிறது. அந்தக் கோபத்தில்தான் ஆனாெல்ட்டை முன்மொழிய அவர் மறுத்துவிட்டார். ஆனோல்ட் அவர்களை மேயராகத் தெரிவு செய்வதற்கு ததேகூ உறுப்பினர்கள் சிலர் எதிர்ப்புத் தெரிவித்தனர்.. ஆனால் கட்சிக் கட்டுப்பாடு கருதி ஆனோல்ட் அவர்களுக்கு வாக்களித்தனர். இறுதி முடிவு எடுக்கு முன்னர் சுமந்திரன் தான் வந்து கொண்டிருப்பதாகவும் காலை 10.30 நடக்க விருந்த கூட்டத்தை பிப 1.30 மணிக்கு பின்போடுமாறு கேட்டிருந்தார். அவரது வேண்டுகோள் தலைவரால் புறக்கணிக்கப்பட்டது. சுமந்திரனையும் சேர்த்து ஒரு முடிவு எடுத்திருந்தால் அதை – என்ன முடிவாக இருந்தாலும் – அதனை மற்றவர்கள் ஒத்துக் கொண்டிருப்பார்கள். வெற்றி – தோல்வியைப் பற்றிக் கிஞ்சித்தும் கவலைப்படாது ஆனோல்ட் அவர்களை மேயர் பதவிக்கு போட்டியிட வைப்பது என்ற முடிவை எடுத்த பின்னர் அதற்கேற்ப கட்சித் தலைமை காய் நகர்த்தியது என்பது புலனாகிறது. ஏற்கனவே கட்சித் தலைமை மீது விமர்சனம் இருந்து வருகிறது. இனி அது அதிகரிக்கும் என எதிர்பார்க்கலாம்.